Қазақстан жол ғылыми-зерттеу институтының Құзыреттілікті дамыту орталығы «Автомобиль жолдарын пайдалану (жазғы күтіп-ұстау)» тақырыбында үш күндік кешенді оқыту семинарын ұйымдастыруда.

Іс-шараға еліміздің түкпір-түкпірінен келген 100-ден астам жол саласының мамандары қатысуда. Бағдарлама теориялық және практикалық оқытуды үйлестіреді.

Семинар келесі бағыттарды қамтиды:

• автожолдарды күтіп-ұстауда қолданылатын жаңа технологиялар мен тиімді әдістер;
• цементбетон жамылғыларындағы ақауларды сараптау және оларды жою жолдары;
• эмальдар мен термопластиктердің сапасын бақылау;
• битум эмульсияларын іріктеу мен қолданудың технологиялық ерекшеліктері;
• RCMbase цифрлық платформасын және салалық нормативтік құжаттарды қолдану тәсілдері.

Семинардың тәжірибелік бөлігіне заманауи жол таңбалау техникасының көрсетілімі, қайта таңбалау әдістері, жолға арналған бояулар мен пластиктерді өндіру үдерісімен танысу, сондай-ақ жол белгілері мен ақпараттық таблолар шығаратын өндірістік цехқа бару кіреді. Қатысушылар жол саласындағы заманауи материалдармен, стандарттармен және озық технологиялармен тікелей танысу мүмкіндігіне ие болады.

«ҚазжолҒЗИ» жол саласының мамандары үшін өзекті курстарды ұсына отырып, біліктілікті арттыру бағдарламасын белсенді дамытуды жалғастыруда.