Қазақстан Республикасының Көлік вице-министрі Аблалиев Сатжан Әйтенұлының төрағалығымен "ҚазжолҒЗИ" алаңында автомобиль жолдарын қайта жаңарту және жөндеу объектілерін сапалы жол битумымен қамтамасыз етуге байланысты мәселелерді талқылау бойынша Көлік министрлігі жанындағы жолшылардың Қоғамдық кеңесінің отырысы өткізілді.

Аталған кеңеске «ҚазжолҒЗИ», «ҚазАвтоЖол», «Жол активтерінің ұлттық сапа орталығы», «PIARC» Дүниежүзілік жолшылар қауымдастығының Қазақстандағы ұлттық комитеті, "Қазақстан жолшылар қауымдастығының" басшылығы, сондай-ақ жобалау және мердігерлік ұйымдар қатысты.

Мамандар құрылыс маусымында мердігер компанияларды битуммен үздіксіз қамтамасыз ету, осы шикізатты қабылдау және сақтау үшін қосымша инфрақұрылым құру, оның сапасы мен баға белгілеу мәселелері және оларды шешу жолдарын талқылады. Нәтижесінде осы мәселелерді кешенді қарастыру мақсатында жол картасын әзірлеу туралы шешім қабылданды.

Сонымен қатар, "ҚазжолҒЗИ" және ЖАҰСО өкілдері өткізген асфальтбетон зауыттарының инспекциясының нәтижелері мен жолшы ғалымдардың "Superpave" бағдарламасы бойынша зерттеу нәтижелерін пилоттық жобаларға тәжірибелік енгізу бойынша сұрақтар талқыланды.

Өткізілген кеңес шеңберінде "Қазақстан жолшылар қауымдастығының" "PIARC" Дүниежүзілік жолшылар қауымдастығының Қазақстан Республикасындағы Ұлттық комитетінің қауымдастырылған мүшелеріне кіруі туралы шарт жасалды.