Қазақстанның жол ғылымы халықаралық ғылыми кеңістіктегі орнын нығайтып келеді. 2026 жылы «ҚазжолҒЗИ» АҚ ғалымдары халықаралық Scopus дерекқорында индекстелетін журналдарда алты ғылыми мақала жариялады. Оның төртеуі бірінші квартильдегі (Q1) журналдарда жарық көрсе, бір мақала өз пәндік санаты бойынша үздік 10%-ға (Top 10%) кіретін басылымда жарияланды.

ҚазжолҒЗИ ғалымдарының зерттеулері жол саласының өзекті мәселелеріне арналған. Олардың қатарында жаңа жол-құрылыс материалдарын әзірлеу, битум мен бетонды түрлендіру, өнеркәсіптік жанама өнімдерді пайдалану, жол конструкцияларының ұзақ мерзімділігін арттыру, сондай-ақ машиналық оқыту мен деректерді талдаудың заманауи әдістерін қолдану бағыттары бар.

«Comprehensive evaluation of asphalt mixtures incorporating BOFS aggregate using Kazakhstan pavement criteria and XGBoost optimization with Bayesian hyperparameter tuning» атты зерттеудің Construction and Building Materials халықаралық журналында жариялануы ерекше маңызды нәтиже болды. Бұл басылым Scopus дерекқоры бойынша Q1 санатына жатады және өз пәндік санаты бойынша үздік 10%-ға кіреді.

Зерттеу авторларының бірі — «ҚазжолҒЗИ» АҚ Ғылымды дамыту департаменті директорының орынбасары Асель Нугманова. Ғылыми жұмыс шетелдік ғалымдар Chang-Seon Shon, Dichuan Zhang және Jong Ryeol Kim-мен бірлесіп орындалды.

Зерттеу Қазақстандағы жол жамылғыларына қойылатын талаптарды ескере отырып, BOFS толтырғышы қолданылған асфальтбетон қоспаларын кешенді бағалауға арналған. Жұмысты орындау барысында ғалымдар машиналық оқытудың заманауи әдістерін — XGBoost алгоритмі мен байестік оңтайландыруды қолданды.

«Жоғары рейтингті халықаралық журналдардағы жарияланымдар қазақстандық ғалымдардың зерттеулері ғылыми жаңашылдық пен сапаға қойылатын заманауи талаптарға сәйкес келетінін көрсетеді. Біз үшін бұл жұмыстардың Қазақстан жол саласының нақты міндеттерін шешуге бағытталуы және сонымен қатар халықаралық ғылыми қауымдастықтың қызығушылығын тудыруы ерекше маңызды. Алдағы уақытта да шетелдік әріптестермен бірлескен зерттеулерді дамытып, отандық жол ғылымының халықаралық ғылыми кеңістіктегі орнын нығайта береміз», — деп атап өтті Асель Нугманова.

2026 жылы ҚазжолҒЗИ ғалымдарының зерттеулері Scopus Q1 санатына жататын Polymers, Frontiers in Chemistry және Infrastructures халықаралық журналдарында, сондай-ақ Transportation Infrastructure Geotechnology (Q2) және International Journal of GEOMATE (Q3) басылымдарында жарияланды.

Ғылыми жұмыстардың тақырыптары түрлендірілген битум тұтқырғыштарын зерттеу, цементбетонның ұзақ мерзімділігін арттыру, қайталама және техногендік материалдарды пайдалану, жол конструкцияларының температуралық режимін болжау және инженерлік міндеттерді шешуде машиналық оқыту әдістерін қолдану бағыттарын қамтиды. Scopus-тағы 6 жарияланым | Q1 санатындағы 4 жарияланым | Q1 Top 10% санатындағы 1 жарияланым

ҚазжолҒЗИ Қазақстанның көлік инфрақұрылымындағы өзекті міндеттерді шешуге және отандық зерттеулерді халықаралық деңгейде танытуға бағытталған қолданбалы жол ғылымын дамытуды жалғастыруда.