Айдар: автомобиль жолдарына арналған заманауи материалдар мен технологиялар

Біз автомобиль жолдарының ұзақ мерзімділігін арттыруға бағытталған шешімдерге арналған: «Автомобиль жолдарына арналған заманауи материалдар мен технологиялар» атты ақпараттық айдарды іске қосамыз.

Айдар аясында «ҚазжолҒЗИ» жол саласында қолданылатын әртүрлі материалдар мен технологиялар туралы баяндайды. Атап айтқанда, асфальтобетонға арналған қоспалар мен модификаторлар, қорғаныш және сіңіргіш құрамдар, күшейту шешімдері, сондай-ақ жолдарды салу және пайдалану кезеңдерінде қолданылатын өзге де инженерлік құралдар қарастырылады. Жарияланымдар ақпараттық-талдамалық сипатқа ие болып, жол инфрақұрылымын күтіп-ұстау мәселелеріне кәсіби әрі салмақты көзқарас қалыптастыруға бағытталады.

Айдарды іске қосудың себебі неде?

Қазақстанда әрбір жол-құрылыс маусымы ұқсас мәселелермен қатар жүреді: асфальтобетон жабындарының мерзімінен бұрын тозуы, жөндеуаралық мерзімдердің қысқаруы және автомобиль жолдарын күтіп-ұстауға жұмсалатын шығындардың артуы. Мамандардың айтуынша, бұл жағдайлар тек құрылыс технологияларымен ғана емес, жолдарды пайдалану шарттарымен және жабындарды қорғауға арналған жүйелі тәсілдің болмауымен де байланысты.

Еліміздің асфальтобетон жолдары күрт континенттік климат жағдайында, температураның айтарлықтай ауытқуы, ылғалдың әсері және ауыр жүк көліктері қозғалысының үдемелі өсуі аясында пайдаланылуда. Бұл факторлар битумның қартаюын жеделдетіп, микро жарықшақтардың пайда болуына және жол жабынының пайдалану сипаттамаларының біртіндеп төмендеуіне әкеледі. Сол себепті заманауи шешімдер туралы әрқашан хабардар болып отыруымыз қажет.